Mae dyn yr oedd yr heddlu’n credu ei fod yn cario bwa croes wedi’i saethu gan swyddogion yng Nghasnewydd.

Cafodd y gwasanaethau brys eu galw i gyfeiriad yn St Edward Street ychydig cyn hanner nos, nos Wener yn dilyn adroddiadau am “ymddygiad bygythiol”.

Dywedodd Heddlu Gwent fod dyn 21 oed o Gasnewydd wedi’i weld gydag arf yn ei feddiant cyn iddo gael ei saethu gan swyddogion.

Cafodd ei gludo i’r ysbyty ac mae ei gyflwr yn sefydlog.

Dywedodd llefarydd ar ran yr heddlu: “Aeth swyddogion i’r lleoliad, ynghyd â swyddogion arfog sydd wedi’u hyfforddi’n arbennig, ar ôl i ddyn gael ei weld gydag arf y credir ei fod yn fwa croes.

“Yn ystod ein hymateb, cafodd dyn 21 oed o Gasnewydd ei saethu gan swyddogion gydag arf tanio a gyhoeddwyd gan yr heddlu.”

Dywedodd y Dirprwy Brif Gwnstabl Nicholas McLain: “Rydym yn deall y pryder y gallai’r digwyddiad hwn ei achosi yn ein cymunedau, ond does dim perygl parhaus i’r cyhoedd gan mai digwyddiad unigol yw hwn.

“Dydyn ni ddim yn chwilio am unrhyw un arall mewn cysylltiad ag ef.

“Er bod adroddiadau am droseddau sy’n ymwneud ag arfau tanio ac arfau eraill yn brin yng Ngwent, rydym yn cymryd pob adroddiad o’r fath o ddifrif ac yn ymateb mewn ffordd broffesiynol a chymesur, yn seiliedig ar lefel y risg a awgrymir gan y wybodaeth sydd ar gael.”