Mae Heddlu Gwent wedi cyhuddo dyn 37 oed o Gwmbrân o lofruddiaeth ar ôl marwolaeth dyn arall yn Nhorfaen.

Cafodd Aaron Cook ei gyhuddo hefyd o wneud bygythiadau i ladd ac aflonyddu, ac fe fydd yn ymddangos gerbron Llys Ynadon Casnewydd ddydd Llun.

Aeth swyddogion i eiddo yn Bythway Road, Trefddyn ym Mhont-y-pŵl, tua 16:55 ddydd Iau 23 Ebrill. Cafodd parafeddygon o Wasanaeth Ambiwlans Cymru ac Ambiwlans Awyr Cymru hefyd eu galw.

Cafodd Nicholas ‘Brian’ Parfitt, 74, o Drefddyn, ei ddatgan yn farw yn y fan a’r lle.

Mae swyddogion arbenigol yn parhau i gefnogi’r teulu.

Dywedodd yr uwch swyddog ymchwilio, y Ditectif Brif Arolygydd Shelly Comley: “Rydym yn deall bod llawer iawn o ddiddordeb wedi bod yn yr ymchwiliad hwn.

“Rydym yn gofyn i bobl ystyried sut y gall eu hiaith, yn enwedig sylwadau sy’n cael eu gwneud ar-lein, effeithio ar ein gallu i ddod ag unrhyw un y canfyddir ei fod wedi cyflawni trosedd o flaen eu gwell.

“Bydd swyddogion yn parhau yn yr ardal wrth i’n hymholiadau barhau, felly os oes gan unrhyw un wybodaeth, siaradwch â’n swyddogion neu cysylltwch â ni yn y ffordd arferol.”

Gall unrhyw un sydd â gwybodaeth gysylltu â'r heddlu drwy ffonio 101, anfon neges uniongyrchol ar y cyfryngau cymdeithasol, neu ddefnyddio’r ffurflen ar wefan yr heddlu, gan ddyfynnu’r cyfeirnod 2600125343.

Mae modd hefyd ffonio Crimestoppers yn ddienw ar 0800 555 111.