Mae trên wedi dod oddi ar y cledrau ger tref yn Nwyrain Sussex, Lloegr, yn ôl Heddlu Trafnidiaeth Prydain.

Mae’r gwasanaethau brys, gan gynnwys parafeddygon a’r gwasanaeth tân, wedi’u galw i’r digwyddiad. 

Mae lluniau o’r safle yn dangos cerbydau’r trên wedi gwyro i’r ochr gydag aelodau o'r gwasanaethau achub ar ben rhai o’r cerbydau.

Mae’r cwmni trenau Southern Rail wedi cadarnhau bod trên wedi dod oddi ar y cledrau yn yr ardal rhwng Haywards Heath a Lewes.

O ganlyniad, does dim trenau’n gallu teithio rhwng Brighton a Lewes, Haywards Heath a Lewes, na Seaford/Eastbourne ar hyn o bryd.

Mae disgwyl tarfu sylweddol ar wasanaethau tan o leiaf 22:00 nos Iau, ac mae teithwyr yn cael eu cynghori i ohirio eu teithiau neu ddefnyddio llwybr teithio arall.

Dywedodd yr Ysgrifennydd Trafnidiaeth, Heidi Alexander, ei bod yn “bryderus iawn” am y digwyddiad.

Nid oes manylion wedi’u cadarnhau hyd yma ynglŷn ag unrhyw anafiadau.