Mae’r awdurdodau ar ffin Nepal a Tsieina yn rhybuddio fod ‘na risg o lifogydd pellach wrth i lefel y dŵr gynyddu mewn rhai mannau, ddyddiau’n unig ers i afonydd orlifo a lladd cannoedd.

Yn ôl Heddlu Nepal, mae timau achub yn parhau i chwilio am oroeswyr ond maen nhw wedi cael cyngor i symud i lecyn diogel ar unwaith lle fo bygythiad o lifogydd pellach.

Mewn diweddariad ddydd Gwener, dywedodd yr heddlu fod 547 o gyrff bellach wedi eu canfod.

Mae'n debyg bod bron i 1,000 o bobl yn parhau ar goll - yn eu plith mae dros 500 o dramorwyr, gan gynnwys degau o ddinasyddion Prydain.

Tarodd y llifogydd sydyn dinistriol ardal Rasuwa yn Nepal, sy’n ffinio â rhanbarth Tibet yn Tsieina, fore Mercher, gyda sawl afon yn gorlifo ac yn gorchuddio pentrefi â mwd brown, trwchus.

Rhybudd gorlifo pellach

Mae’r awdurdodau yn Tsieina yn dweud bod argae ar ochr Tibet y ffin wedi torri'n barod, gan gynyddu'r risg o lifogydd pellach.

Yn ôl Adran Adnoddau Dŵr Tsieina, mae disgwyl i dri miliwn metr ciwbig yn fwy o ddŵr lifo i ardal yr argae dros y tridiau nesaf.

Mae byddin Nepal hefyd wedi gyrru tîm i’r ffin i archwilio afon Bhotekoshi wrth i'r awdurdodau geisio delio gydag effaith ysgytwol y llifogydd gwreiddiol.

Gyda channoedd o bobl yn parhau ar goll, mae teuluoedd yn Nepal a thramor yn parhau i ddisgwyl i glywed os yw eu hanwyliaid yn ddiogel.

Mae’r ymdrechion i achub pobl wedi cael eu llethu gan faint y dinistr. Yn ôl awdurdodau Nepal, mae dros 25 milltir o ffyrdd wedi cael eu niweidio, yn ogystal â nifer o bontydd.

Image

Yn siarad gyda Times Radio ddydd Gwener, dywedodd Rajesh Srivastava, pennaeth y Groes Goch Brydeinig yn Asia, bod y sefyllfa'n "heriol iawn" a bod y dinistr wedi effeithio ar isadeiledd hanfodol.

"Mae'r drychineb yn dal i ddatblygu," meddai.

"Mae'n ardal sy'n anodd iawn i'w chyrraedd, ond mae'n amlwg bod y gymuned wedi'i chwalu'n llwyr, teuluoedd wedi colli eu cartrefi a'u bywoliaethau, llawer o bobl wedi marw neu ar goll, a seilwaith hanfodol wedi cael ei ddifrodi."

Dywedodd Bishal Nath Upreti, llywydd canolfan rheoli trychinebau yn Nepal, fod y llifogydd fel “tswnami o’r awyr” a bod pentrefi cyfan wedi cael eu dinistrio.

Pobl ifanc ar goll

Gyda 33 o ddinasyddion Prydain dal ar goll, mae Llywodraeth y DU wedi cynnig £5m i Nepal i help gyda’r sefyllfa.

Ymhlith y Prydeinwyr mae merch 13 oed a bachgen 14 oed. Mae’n debyg fod sawl un ar bererindod i Fynydd Kailash, safle pwysig i Hindŵiaid.

Prif lun: Reuters