Mae merch saith oed o Gaerfyrddin sydd wedi helpu i godi mwy na £65,000 i Ambiwlans Awyr Cymru wedi derbyn tystysgrif arbennig gan Wobrau Plentyn Cymru 2026.

Cafodd Gracie Kinnear ei henwebu gan yr elusen i gydnabod ei hymdrechion i godi arian, ar ôl iddi wella o anafiadau a oedd yn peryglu ei bywyd yn dilyn gwrthdrawiad ffordd.

Daeth Gracie yn wyneb ymgyrch Nadolig Ambiwlans Awyr Cymru ym mis Rhagfyr y llynedd, gan helpu i godi mwy na £65,000.

Disgrifiodd ei mam, Emma, y gydnabyddiaeth fel un "hynod deimladwy", gan ddweud bod y teulu wedi cael eu synnu ar ôl derbyn gwahoddiad i ymweld â chanolfan yr Ambiwlans Awyr yn Llanelli, Sir Gâr, ym mis Awst.

"Roedd hi'n foment mor arbennig pan dderbyniodd Gracie ei thystysgrif - roedd ei hwyneb yn goleuo," meddai Emma.

"Rydym yn teimlo'n hynod o lwcus; mae hyn wir yn golygu’r byd i ni.

"Pe baech wedi dweud wrtha i dair blynedd yn ôl mai dyma fyddai'r dyfodol, fyddwn i byth wedi eich credu."

Flynyddoedd yn ôl, cafodd Gracie ei chludo ar frys i Ysbyty Glangwili ar ôl bod mewn gwrthdrawiad ffordd difrifol.

Cafodd ei thrin gan barafeddygon Ambiwlans Awyr Cymru a wnaeth ddarganfod fod ei hysgyfaint wedi datchwyddo a'i bod yn gwaedu'n fewnol. 

Cafodd driniaeth frys, gan gynnwys trallwysiadau gwaed, cyn cael ei throsglwyddo i Ganolfan Niwrolawfeddygaeth a Thrawma Pediatrig Ysbyty Athrofaol Cymru.

Yno cafodd ei rhoi mewn coma, ac roedd ei chyflwr yn hynod fregus am bum niwrnod. 

Roedd ganddi anafiadau difrifol, gan gynnwys asgwrn ysgwydd, asennau a phelfis wedi torri, yn ogystal ag anafiadau i'w iau a'i haren dde.

Bu'n rhaid iddi gael llawdriniaeth hefyd i ailgysylltu ei chlust a chroen ei phen â'i phen.

'Taith hir ac anodd'

Roedd angen dwy flynedd o adsefydlu ar Gracie, a bu'n rhaid iddi wisgo siwt arbennig i helpu i adlinio ei chorff.

"Mae'r daith wedi bod yn hir ac yn anodd; bu'n rhaid i mi newid swydd er mwyn sicrhau ei bod yn gallu mynd i bob un o'i hapwyntiadau," meddai Emma.

"Dychwelodd i'r ysgol, a oedd yn gyflawniad mawr. Dysgodd yn araf i gerdded eto a bwydo ei hun.

"Mae ei brawd Chester wedi bod yn anhygoel bob cam o'r ffordd. Mae'n ei hannog gymaint ac ef yw ei chefnogwr mwyaf."

Image

I ddathlu cyflawniadau Gracie, bydd y teulu'n cael ymweld â pharc Bluestone yn Sir Benfro.

Mae Gracie wrth ei bodd yn nofio, ac roedd hydrotherapi yn rhan bwysig o'i rhaglen adsefydlu.

"Dydyn ni byth yn cymryd y pethau syml yn ganiataol," meddai Emma.

"Roedd yna adeg pan oedd nofio yn ymddangos yn amhosib."

Dywedodd Steven Stokes, Cyfarwyddwr Cyfathrebu Strategol ac Ymgysylltu Ambiwlans Awyr Cymru, ei bod yn "fraint go iawn" croesawu Gracie a chyflwyno'r dystysgrif iddi ar ran Gwobrau Plentyn Cymru.

"Mae Gracie yn ferch fach anhygoel, ac mae ei stori wedi cyffwrdd â chymaint o bobl," meddai.

"Mae ei heffaith gadarnhaol ar bobl ledled Cymru, a hithau'n mor ifanc, yn wirioneddol ryfeddol."