Mae Prif Weinidog y DU Syr Keir Starmer wedi cyrraedd Saudi Arabia wedi i America ac Iran ddod i gadoediad nos Fawrth.

Fe fydd y cadoediad yn para am bythefnos.

Croesawu'r newyddion y mae Prif Weinidog y DU wedi ei wneud, gan ddweud y bydd y cadoediad yn "dod â moment o ryddhad i'r rhanbarth ac i weddill y byd."

Ychwanegodd: "Gydag ein partneriaid mae'n rhaid i ni wneud popeth y gallwn ni i gefnogi a chadw'r cadoediad, ei droi yn gytundeb fydd yn para ac ail agor culfor Hormuz."

Mae'r Prif Weinidog wedi teithio i'r Gwlff i gyfarfod arweinwyr gwledydd yno er mwyn "trafod ymdrechion diplomataidd i gefnogi a chynnal y cadoediad" meddai Rhif 10.

Mae disgwyl iddo hefyd gyfarfod aelodau o'r lluoedd arfog Prydeinig yn y rhanbarth. 

Roedd ei ymweliad â'r Gwlff wedi ei drefnu cyn y cadoediad.

Fe ddaeth y cyhoeddiad tua awr cyn i fygythiad Donald Trump i fomio Iran "yn ôl i Oes y Cerrig" ddod i rym.

Tanwydd

Fe wnaeth ymosodiadau’r Unol Daleithiau ac Israel ar Iran ac ymateb Tehran, gan gynnwys targedu gwladwriaethau’r Gwlff a chau Culfor Hormuz, gynyddu prisiau tanwydd yn sylweddol ledled y byd.

Roedd pris cyfartalog diesel yn y DU yn 190.6c fore Mercher, i fyny 34% ers 28 Chwefror pan ddechreuodd y brwydro meddai’r sefydliad moduro RAC, tra bod prisiau cyfartalog petrol di-blwm wedi cyrraedd 157.7c, i fyny 19%.

Roedd Mr Trump wedi bygwth dileu gorsafoedd ynni a phontydd Iran os nad oedd modd cael cytundeb i ailagor Culfor Hormuz.

Ond llai na dwy awr cyn i’w amserlen ddod i ben, dywedodd arlywydd yr Unol Daleithiau ei fod yn atal ei fygythiad.

Dywedodd datganiad ar y cyd gan arweinwyr y byd gan gynnwys Syr Keir y byddent yn “cyfrannu at sicrhau rhyddid morwrol yng Nghulfor Hormuz”.