Mae'r heddlu yn ymchwilio i adroddiadau am ymosodiad honedig mewn gêm bêl-droed yn y de ddydd Sadwrn.

Cafodd y gêm rhwng Port Talbot a Bridgend Street yn Uwch Gynghrair De Cymru ei gohirio ar ôl yr hanner cyntaf.

2-2 oedd y sgôr rhwng y clybiau, sy'n eistedd yn y trydydd a'r pedwerydd safle, pan gafodd y gêm ei gohirio.

Dywedodd Heddlu De Cymru eu bod yn "ymchwilio i adroddiadau o ymosodiad yn ystod y gêm".

Ychwanegodd y llu nad oedd neb wedi cael ei arestio hyd yma a bod ymholiadau'n parhau.

Dywedodd Cymdeithas Bêl-droed De Cymru eu bod nhw hefyd yn cynnal ymchwiliad i'r ymosodiad honedig.

Mewn datganiad ar blatfform X nos Sadwrn, dywedodd Clwb Pêl-droed Port Talbot: "Yn anffodus mae ein gêm yn erbyn Bridgend Street wedi'i gohirio oherwydd ymosodiad 'honedig' ar ein rheolwr a'n chwaraewyr."

Dywedodd Bridgend Street na fyddan nhw'n rhoi sylw ar y mater er mwyn "parchu'r gynghrair a'r dyfarnwr".

Dywedodd Uwch Gynghrair De Cymru bod unrhyw ymholiadau am gamymddwyn yn ystod gemau yn fater i Gymdeithas Bêl-droed De Cymru.

'Dim yn goddef trais'

Mewn datganiad i Newyddion S4C dywedodd Cymdeithas Bêl-droed De Cymru (CBDC) eu bod yn cynnal ymchwiliad ffurfiol i'r ymosodiad honedig.

"Mae CBDC yn ymwybodol o sawl sylwad ar-lein ynglŷn â'r gêm yn Uwch Gynghrair De Cymru rhwng Bridgend Street a Port Talbot ar 18 Ebrill 2026, a gafodd ei gohirio," meddai llefarydd.

"Un o flaenoriaethau mwyaf CBDC yw lles a diogelwch pawb sy’n ymwneud â’r gêm, gan gynnwys chwaraewyr, dyfarnwyr a gwylwyr.

"Dyw CBDC ddim yn goddef unrhyw fath o drais neu anhrefn o unrhyw fath, ac yn pwysleisio eto nad oes lle i ymddygiad o’r fath mewn pêl-droed ar unrhyw lefel.

"Ar hyn o bryd mae’r amgylchiadau o amgylch y gêm hon yn destun ymchwiliad ffurfiol gan CBDC. 

"Mae CBDC yn cydweithredu’n llawn â Heddlu De Cymru a Chymdeithas Bêl-droed Cymru, a bydd unrhyw fater sy'n ymwneud a'r digwyddiad yn cael ei drafod drwy’r prosesau disgyblu a rheoleiddio priodol.

"Gan fod y mater hwn yn parhau o dan ymchwiliad gweithredol, ni fydd CBDC yn gwneud unrhyw sylw pellach ar hyn o bryd."