Mae swyddogion Cyngor Gwynedd wedi argymell peidio â chynnig gostyngiad yn y dreth gyngor ar ail gartrefi yn y sir ar gyfer y flwyddyn ariannol nesaf.

Bydd Cabinet y cyngor yn ystyried ei “opsiynau dewisol” ar gyfer y premiwm treth gyngor mewn cyfarfod ddydd Mawrth nesaf.

Mae disgwyl i aelodau'r Cabinet ystyried argymhelliad i beidio â chynnig unrhyw ostyngiad yn y dreth gyngor ar ail gartrefi Dosbarth A.

Mae swyddogion hefyd yn argymell peidio â chynnig unrhyw ostyngiad ar ail gartrefi Dosbarth B, a chodi premiwm o 150% arnynt.

Mae'r swyddogion hefyd yn argymell peidio â chynnig unrhyw ostyngiad ar eiddo sydd wedi bod yn wag ers chwe mis neu fwy, a chodi premiwm o 150% ar eiddo sydd wedi bod yn wag ers 12 mis neu fwy.

Mae'n ofynnol i'r cyngor wneud penderfyniad bob blwyddyn os yw am godi premiwm treth gyngor ar eiddo sydd wedi bod yn wag ers cyfnod hir ac ail gartrefi, sydd hefyd yn cael eu hadnabod fel “anheddau a feddiannir yn achlysurol”.

Heb benderfyniad o'r fath, byddai gostyngiad o 50% yn y dreth gyngor ar yr eiddo hyn.

Ar gyfer blwyddyn ariannol 2026/27, mae'r cyngor wedi codi premiwm treth gyngor o 150% ar ail gartrefi ac eiddo sydd wedi bod yn wag ers cyfnod hir.

Fodd bynnag, mae deddfwriaeth Llywodraeth Cymru yn caniatáu i'r cyngor godi premiwm o hyd at 300% os yw'n dymuno gwneud hynny.

“Pe bai'r cyngor yn cynyddu cyfradd y premiwm, byddai'n rhaid iddo ystyried a fyddai penderfyniad o'r fath yn rhesymol, ar ôl ystyried canllawiau statudol, canlyniad ymchwil a chyngor cyfreithiol y mae'r awdurdod wedi'i gael,” meddai adroddiad y Cabinet.

Os caiff yr argymhellion eu cymeradwyo, byddant yn cael eu cyflwyno i gyfarfod y cyngor llawn ar 3 Rhagfyr 2026, pan fydd penderfyniad terfynol yn cael ei wneud.

Mewn cyfarfod y mis diwethaf, penderfynodd Cyngor Sir Penfro gadw'r premiwm treth gyngor ar ail gartrefi ar 125%, gyda 29 o gynghorwyr yn pleidleisio o blaid a 21 yn erbyn.