Mae dyn 50 oed wedi marw ar ôl mynd i mewn i'r dŵr ar draeth yng Nghastell-nedd Port Talbot.

Cafodd y gwasanaethau brys eu galw i draeth Aberafan am 16.25 ddydd Mercher yn dilyn adroddiad bod dyn angen cymorth ar ôl mynd i mewn i'r dŵr yno.

Roedd Gwylwyr y Glannau, yr Ambiwlans Awyr a pharafeddygon hefyd wedi cael eu galw i'r lleoliad.

Er gwaethaf ymdrechion y gwasanaethau brys, bu farw'r dyn o Gastell-nedd Port Talbot yn y fan a'r lle.

Dywedodd Heddlu De Cymru fod ei berthnasau agosaf wedi cael gwybod. 

Nid yw'r farwolaeth yn cael ei thrin fel un amheus.