Mae cynllun am fferm wynt yn Sir Gâr wedi cael ei dynnu’n ôl.

Mae cwmni Bute Energy wedi tynnu cais am 13 o dyrbinau ym Mharc Egni Nant Ceiment, tua thair milltir y tu allan i Lanbedr Pont Steffan, oherwydd “heriau amgylcheddol, masnachol a thir” oedd yn “unigryw i Nant Ceiment.”

Cafodd y penderfyniad ei wneud yn dilyn adolygiad manwl yn ystod arolygon ac asesiadau cynnar, gan hefyd ystyried gofynion cynllunio.

Fe wnaeth adolygiad o’r data ganfod heriau posib ar y safle a fyddai wedi cael “effaith sylweddol ar hyfywedd hir-dymor” y fferm wynt.

Mae’r cwmni yn dweud “ei fod bob amser yn ceisio cyflwyno ceisiadau o'r safonau uchaf, sydd nid yn unig yn cydymffurfio â pholisi cynllunio ond sydd o fudd i'r amgylchedd lleol a phobl leol.”

Dywedodd Daniel Wills, uwch reolwr prosiect Bute Energy: “Mae hwn yn enghraifft o system gynllunio Cymru ar waith, gan sicrhau mai dim ond y ceisiadau cywir a gorau sy'n cael eu hystyried. 

“Hoffem estyn ein diolch i bawb sydd wedi gweithio gyda ni i ddatblygu ein ceisiadau hyd yn hyn.”

'Niferoedd'

Mae rhai sydd wedi gwrthwynebu’r prosiect wedi croesawu’r datblygiad.

Dywedodd un ymgyrchydd, James Holt, sydd yn byw dair milltir o’r safle arfaethedig: “Rydw i’n falch iawn. Mae’r syniad fod yna dyrbinau 230m o uchder yn edrych dros Gwm Teifi yn fy nychryn.”

Mae Bute Energy wedi bod yn gweithio ar gynlluniau am 14 o ffermydd gwynt, gyda’r mwyafrif yng nghanolbarth Cymru.

Fe fyddai fferm wynt Nant Ceiment wedi cynhyrchu digon o egni i gyflenwi trydan i 61,100 o gartrefi, yn ôl y cwmni.

Mae Llywodraeth Cymru eisoes wedi gosod targed i gynhyrchu ynni adnewyddadwy sydd yn gyfartal â 100% o ddefnydd trydan Cymru erbyn 2035.

Fe wnaeth adroddiad yn 2023 amcangyfrif fod yn ffigwr yn 53% ar y pryd.

Dywedodd y Cynghorydd Denise Owen, sy’n cynrychioli ardal Llanybydder, fod sawl person yn ei hardal o blaid prosiectau gwyrdd, ond yn pryderu am effaith isadeiledd peilonau.

“Y niferoedd yw e, dyna’r cyfan,” meddai. “A ni fyddai unrhyw un yn becso os taw’r ceblau’n mynd o dan y ddaear. Rwy’n gobeithio mai dyma’r ddechrau o ychydig bach o synnwyr.

“Mae’n rhaid i ni wneud rhywbeth i’r blaned – mae pawb yn cydnabod hynny. Mae Cyngor Sir Gâr wedi datgan argyfwng hinsawdd. Ond mae’n rhaid i ni ystyried yr hyn sydd gan bobl i’w ddweud.

“Sa’ i ddim yn berson “nid yn fy ngardd gefn i”,  ond rwyf yn “nid gymaint yn fy ngardd gefn.”