Mae’r triawd rap Kneecap wedi ymweld â Portadown i ddangos eu cefnogaeth i drigolion Ffordd Garvaghy - ffordd sydd yn destun anghydfod ffyrnig rhwng Gweriniaethwyr ac Unoliaethwyr yn Drumcree.

Aeth Moglai Bap, Mo Chara a DJ Provai, sef Naoise Ó Cairealláin, Liam Óg Ó hAnnaidh a JJ Ó Dochartaigh, i ysgol leol cyn cyfarfod trigolion yng Nghanolfan Gymunedol Drumcree ddydd Sul.

Roedd eu cyfreithiwr Darragh Mackin, sydd hefyd yn cynrychioli trigolion Ffordd Garvaghy, gyda nhw, yn ogystal â’r gantores werin Wyddelig Radie Peat.

Daw’r ymweliad wrth i’r gwrthdaro ynghylch yr orymdaith barhau am wythfed diwrnod.

Anghydfod

Dechreuodd yr anghydfod wedi i Gomisiwn Gorymdeithiau Gogledd Iwerddon roi caniatâd i’r Urdd Oren orymdeithio ar hyd Ffordd Garvaghy am y tro cyntaf ers 30 mlynedd.

Roedd yr orymdaith i fod i gael ei chynnal ddydd Sul diwethaf, ond fe wnaeth trigolion Ffordd Garvaghy, ardal genedlaetholgar Weriniaethol yn bennaf, rwystro’r ffordd.

Mae Sinn Féin, yr SDLP a People Before Profit ymhlith y rhai sydd wedi cefnogi gwrthwynebiad y trigolion i’r orymdaith.

Cadarnhaodd Gwasanaeth Heddlu Gogledd Iwerddon fod y brotest heb ei hysbysu i’r Comisiwn Gorymdeithiau ac felly’n anghyfreithlon.

Roedd Prif Weinidog Gogledd Iwerddon a dirprwy arweinydd Sinn Féin, Michelle O’Neill, ymhlith nifer o wleidyddion amlwg a gymerodd ran yn y brotest.

Mae’r Urdd Oren wedi ceisio dechrau’r orymdaith sawl gwaith ers hynny, ond mae Ffordd Garvaghy yn parhau wedi’i rhwystro gan drigolion.

Dywedodd yr heddlu eu bod yn cydnabod bod penderfyniad y Comisiwn Gorymdeithiau yn parhau mewn grym, ond bod cau’r ffordd yn angenrheidiol er mwyn cynnal heddwch a threfn.

Her gyfreithiol

Bydd her gyfreithiol newydd yn erbyn yr orymdaith yn cael ei chlywed yn Llys Apêl Belfast ddydd Llun.

Mae cyfreithwyr ar ran Cynghrair Trigolion Ffordd Garvaghy yn dadlau bod y Comisiwn Gorymdeithiau wedi camddehongli asesiad yr heddlu o’r perygl o anhrefn.

Dywedodd Ysgrifennydd Gogledd Iwerddon, Syr Chris Bryant, fod y sefyllfa yn Portadown “er budd neb” ac fe apeliodd am heddwch.

Mae Sinn Féin wedi galw arno i ddefnyddio ei bwerau i wahardd yr orymdaith.

Ond mewn digwyddiad arall yn ystâd deyrngarol Edgarstown, dywedodd cefnogwyr yr Urdd Oren fod y caniatâd i gynnal yr orymdaith yn parhau mewn grym ac y dylai gael mynd yn ei blaen.

Mae’r PSNI wedi rhybuddio y bydd unrhyw un sy’n parhau i rwystro Ffordd Garvaghy yn cael ei ystyried yn rhan o brotest anghyfreithlon, ac y gallai’r rhai sydd wedi torri’r gyfraith wynebu camau troseddol.