Bydd y BBC yn rhoi’r gorau i ddarlledu BBC Scotland, BBC Three a BBC Radio 4 Extra ar deledu a radio traddodiadol yng ngwanwyn 2027.

Mae’n rhan o fesurau pellach i dorri costau, ar ôl cyhoeddi arbedion yn BBC Cymru, BBC Local, BBC News a gwasanaethau cenedlaethol a rhanbarthol eraill.

Mae’r BBC yn dweud bod angen gwneud penderfyniadau anodd oherwydd y pwysau ariannol parhaus sy’n wynebu’r sefydliad. 

Dywedodd y gorfforaeth bod rhaid iddo arbed £500 miliwn erbyn 2028.

Mewn neges i staff yn amlinellu’r newidiadau, dywedodd Cyfarwyddwr Cyffredinol y BBC, Matt Brittin: “Mae angen i ni wneud i bob punt weithio’n galetach dros gynulleidfaoedd wrth i ni ymateb i’r pwysau uniongyrchol ar gostau ac ailddyfeisio’r BBC ar gyfer byd sy’n newid. 

“Rydyn ni i gyd yn gwybod bod hynny’n golygu dewisiadau anodd.”

Bydd y newidiadau yn golygu:

• Bydd BBC Scotland yn parhau fel sianel ar iPlayer yn unig. Bydd cynnwys hefyd ar gael ar BBC One a BBC Two yn yr Alban.
• Bydd rhaglenni sy’n cael eu comisiynu gan BBC Three ar gael ar BBC iPlayer ac ar lwyfannau eraill, gan gynnwys YouTube. Bydd mwy o fuddsoddiad mewn cynnwys ar gyfer cynulleidfaoedd iau.
• Bydd rhaglenni Radio 4 Extra ar gael ar BBC Sounds. Bydd The Daily Service ar gael ar BBC Sounds ac ar radio lleol.

Ychwanegodd Matt Brittin: “Bydd llawer o’r cynnwys gwych maen nhw’n ei ddarlledu ar hyn o bryd yn dal ar gael lle mae cynulleidfaoedd eisoes yn ei fwynhau, ar iPlayer a Sounds. 

“Er bod dyfalu wedi bod yn y cyfryngau, rwy’n cydnabod y bydd cadarnhau’r newyddion hwn yn anodd i gynulleidfaoedd a chydweithwyr.”

Mae rhagor o newidiadau hefyd wedi eu cyhoeddi yn BBC News heddiw, gyda mwy na chant o swyddi i ddiflannu. 

Bydd Cyfarwyddwr newydd BBC News, Rachel Jupp, yn amlinellu cynlluniau i wneud rhagor o arbedion yn gynnar y flwyddyn nesaf, fel rhan o’r weledigaeth hirdymor ar gyfer BBC News.

Bydd adrannau eraill yn cadarnhau eu cynlluniau arbed cyn gynted â phosib dros y misoedd nesaf.