Bydd Andy Burnham yn galw am fwy o reolaeth gyhoeddus dros ddŵr, ynni a thrafnidiaeth yn ei ymddangosiad cyntaf yn Nhŷ’r Cyffredin ers dod yn Brif Weinidog.

Bydd Mr Burnham yn gwneud ei ymddangosiad cyntaf ar y meiciau gwyrdd fel Prif Weinidog ddydd Mawrth. 

Mae disgwyl i Mr Burnham wynebu dwy awr o gwestiynau gan ASau yn Nhŷ’r Cyffredin, y tro cyntaf iddo gynrychioli y llywodraeth yno ers 16 mlynedd.

Bydd yn dadlau y gall mwy o reolaeth gyhoeddus dros nifer o wasanaethau’r wlad helpu i sbarduno twf economaidd.

Mae disgwyl i’r Prif Weinidog ddweud nad yw gwasanaethau hanfodol wedi cael eu rhedeg er budd y cyhoedd. 

Bydd yn dadlau nad ydyn nhw’n ddibynadwy nac yn fforddiadwy bellach, gan roi pwysau ar aelwydydd a rhwystro’r economi ehangach.

Yn ôl y Guardian, bydd Mr Burnham yn gwneud rheolaeth gyhoeddus dros wasanaethau pwysig yn flaenoriaeth i’r Llywodraeth yn ystod y misoedd nesaf.

Dywedodd ffynhonnell yn Rhif 10: “Mae Andy yn obeithiol am ddyfodol ein gwlad. Mae ganddo gynllun clir ar gyfer gwella’r sefyllfa.

“Mae’n benderfynol mai dyma fydd y foment y byddwn ni’n adfer gobaith.”

Benben

Bydd y datganiad i’r Senedd ddydd Mawrth hefyd yn gyfle i ASau o bob rhan o’r Tŷ holi’r Prif Weinidog am y gyfres o bolisïau a gyhoeddodd dros yr haf.

Mae’r rhain yn cynnwys cynigion i helpu teuluoedd a busnesau i ymdopi â chostau byw cynyddol. 

Yn eu plith mae’r toriad mewn TAW ar filiau ynni, a fydd yn dod i rym ym mis Hydref, a thoriad mawr mewn ardrethi busnes i dafarndai a chlybiau.

Bydd hefyd yn wynebu mwy o graffu yn y siambr ddydd Mercher, pan fydd yn mynd benben ag arweinydd y Ceidwadwyr, Kemi Badenoch, yn ei Sesiwn Holi’r Prif Weinidog cyntaf.

Fe wnaeth Mrs Badenoch ad-drefnu ei chabinet cysgodol ddydd Llun Gŵyl y Banc. Cafodd ffigyrau mawr y Ceidwadwyr, gan gynnwys Syr Mel Stride a’r Fonesig Priti Patel, eu diswyddo cyn i’r Senedd ailgyfarfod.