Mae dyn 33 oed wedi cael ei garcharu am dros dair blynedd ar ôl ymosod yn gorfforol ar ddynes a’i rheoli.

Roedd Joshua Wren, o Stryd Cecil, Caergybi, wedi ymddangos yn Llys y Goron yr Wyddgrug ddydd Mercher i gael ei ddedfrydu. 

Roedd wedi ei gael yn euog yn flaenorol o ymddygiad sy’n rheoli ac yn gorfodi.

Roedd hefyd wedi cyfaddef bod â chyffur dosbarth B yn ei feddiant.

Rhwng mis Awst 2025 a mis Chwefror 2026, roedd Wren wedi ymosod yn gorfforol ar y ddynes, gan ei tharo a’i dyrnu yn ei phen.

Roedd wedi ei bygwth a’i rheoli, gan ei gadael yn ofni am ei diogelwch ei hun.

Cafodd ei garcharu am dair blynedd a thri mis.

Cafodd hefyd orchymyn atal am saith mlynedd i amddiffyn y dioddefwr.

Dywedodd y Ditectif Gwnstabl Amie: “Mae gan Wren hanes o drais ac mae wedi dangos unwaith eto ei fod yn berygl i fenywod.

“Rwy’n canmol y dioddefwr am ei dewrder wrth ddod ymlaen. Rwy’n gobeithio y bydd y ddedfryd hon yn ei galluogi i symud ymlaen â’i bywyd.

“Rydym yn cymryd pob math o drais yn erbyn menywod a merched o ddifrif ac yn parhau i ddod â throseddwyr o flaen eu gwell.

“Rwy’n annog unrhyw un sy’n cael eu cam-drin, neu sy’n poeni am les rhywun arall, i gysylltu â ni. Byddwn yn gwrando ac yn gweithredu.”