Mae'r Swyddfa Dywydd wedi cyhoeddi rhybudd melyn am fellt a tharanau ar gyfer y rhan fwyaf o Gymru ddydd Gwener.

Bydd y rhybudd mewn grym rhwng 12:00 a 21:00, gan effeithio'n bennaf ar ardaloedd mewndirol.

Dywedodd y Swyddfa Dywydd y gallai stormydd ddod â rhwng 10 a 20mm o law mewn cyfnod byr mewn rhai mannau, gyda rhwng 30 a 40mm yn bosib mewn ardaloedd sy'n cael sawl cawod ar ôl ei gilydd.

Yn ôl yr asiantaeth, gallai'r tywydd arwain at amodau gyrru anodd, gyda ffyrdd yn wlyb a dŵr yn tasgu neu genllysg mewn rhai mannau. Gallai hynny olygu teithiau hirach mewn ceir a bysiau.

Mae posibilrwydd hefyd o oedi i wasanaethau trên.

Dywedodd y rhybudd y gallai mellt achosi difrod i rai adeiladau a strwythurau, ac y gallai rhai ardaloedd wynebu toriadau byr i gyflenwadau trydan.

Mae perygl hefyd o lifogydd mewn nifer fach o gartrefi a busnesau, a allai achosi difrod i adeiladau neu strwythurau.

Mae'r rhybudd yn effeithio ar y siroedd canlynol:

• Abertawe
• Blaenau Gwent
• Caerffili
• Casnewydd
• Castell-nedd Port Talbot
• Ceredigion
• Conwy
• Gwynedd
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Ddinbych
• Sir Fynwy
• Sir Gaerfyrddin
• Sir y Fflint
• Torfaen
• Wrecsam