Mae’n ddechrau tymor newydd ac yn ddechrau cyfnod newydd cyffrous i’r Cymru Premier gyda’r gynghrair yn cael ei ehangu i 16 tîm yn dilyn 16 o flynyddoedd o dan y fformat blaenorol o 12 tîm.

Cyn y newid diwethaf yn 2010, roedd Uwch Gynghrair Cymru wedi cael ei chynnal gyda niferoedd rhwng 17-21 o glybiau yn ystod y tymhorau cyntaf ar ôl ffurfio’r gynghrair yn 1992, ond hwn fydd y tymor cyntaf erioed gydag 16 o dimau.

Cei Connah v Caernarfon | Dydd Sul – 14:30

Dau dîm sydd heb gael fawr o orffwys dros yr haf yw Cei Connah a Chaernarfon a fuodd yn cystadlu yn rowndiau rhagbrofol Cyngres UEFA ym mis Gorffennaf.

Gorffennodd Cei Connah yn ail yn nhymor 2025/26, ac fe lwyddodd Caernarfon i ennill Cwpan Cymru am y tro cyntaf yn eu hanes.

Ond roedd y canlyniadau’n Ewrop yn siomedig iawn gyda Chaernarfon yn colli o 10-0 dros ddau gymal yn erbyn Levadia Tallinn, a Cei Connah yn colli 3-2 dros ddau gymal yn erbyn Ballkani o Cosofo.

Er y colledion, bydd y ddau glwb yn ysu am gyfle arall i gyrraedd Ewrop, gan anelu i wthio’r Seintiau Newydd am y bencampwriaeth y tymor hwn.

Mae hi wedi bod yn haf o newidiadau mawr yng Nghei Connah gyda 15 chwaraewr yn gadael wrth i John Disney barhau i osod stamp ei hun ar y garfan.

Y golled fwyaf i Gei Connah o bosib yw Rhys Hughes, sydd wedi ymuno â’r Seintiau Newydd ar ôl sgorio 30 o goliau cynghrair mewn dau dymor i Gei Connah (+ creu 16) gan ennill gwobr Chwaraewr y Tymor yn 2024/25.

Mae Noah Edwards wedi gadael y Nomadiaid i ail-ymuno â Chaernarfon, ac mae Ben Nash a Chris Marriott hefyd wedi gwneud y symudiad i’r Oval.

Fe wnaeth y clybiau gyfarfod bedair gwaith y tymor diwethaf ac roedd y record benben yn hafal gyda’r ddau dîm yn ennill unwaith, colli unwaith a chael dwy gêm gyfartal.

Pen-y-bont v Y Seintiau Newydd | Dydd Sul – 14:30

Gyda dim ond un fuddugoliaeth (mewn 90 munud) yn eu 15 gêm gystadleuol ddiwethaf, bydd Pen-y-bont yn benderfynol o ddechrau’r tymor newydd ar nodyn fwy cadarnhaol.

Aeth Pen-y-bont ar rediad echrydus ar ddiwedd y tymor diwethaf cyn curo Hwlffordd yn rownd derfynol y gemau ail gyfle a sicrhau eu lle’n Ewrop.

Ond methiant oedd yr ymgyrch Ewropeaidd, wrth i dîm Rhys Griffiths golli yn erbyn Santa Coloma o Andorra am yr eildro mewn tair blynedd.

Ar ôl ennill pencampwriaeth y Cymru Premier JD am y 18fed tro yn eu hanes, ac am y pumed tymor yn olynol, bydd cewri Croesoswallt yn ffefrynnau clir i godi’r tlws unwaith eto’r tymor yma.

Enillodd Y Seintiau Newydd eu pedair gornest yn erbyn Pen-y-bont y tymor diwethaf gan sgorio cyfanswm o 16 o goliau (4 gôl y gêm).

Fe gafodd blaenwr y Seintiau, Jordan Williams dymor arbennig gan gipio hatric o wobrwyon, sef Chwaraewr y Tymor, Gôl y Tymor a’r Esgid Aur – a daeth pump o’i 26 gôl gynghrair yn erbyn Pen-y-bont.