Mae Prif Weinidog Cymru wedi disgrifio penodiad yr Arglwydd Peter Mandelson fel llysgennad yr Unol Daleithiau fel "camgymeriad". 

Wrth siarad gyda Channel 4 News dywedodd y Farwnes Eluned Morgan na fyddai hi "byth wedi ei benodi. Mae brand Mandelson o wleidyddiaeth Llafur yn estron i wleidyddiaeth Llafur Cymru."

Ond dywedodd fod Syr Keir Starmer wedi "gwneud y penderfyniadau cywir" ar y "materion mawr". 

Fis Chwefror fe wnaeth Eluned Morgan amddiffyn y Prif Weinidog pan ddywedodd arweinydd Llafur yr Alban, Anas Sarwar y dylai rhoi'r gorau i'w swydd. Fe wnaeth Morgan ddisgrifio Starmer fel "dyn anrhydeddus". 

Gofynnwyd iddi a oedd hi yn dal i feddwl mai Syr Keir oedd yr arweinydd gorau ar gyfer Llafur. Dywedodd: "Dwi'n credu mewn cyfnod o ansefydlogrwydd, dwi'n credu pan mae perygl byd eang, pan mae'n costio i bobl o safbwynt prisiau petrol ac olew, yr hyn chi angen yw rhywun i wneud y penderfyniadau cywir ar y materion mawr.

"Dyna mae e wedi gwneud pan mae'n dod i'r sefyllfa yn y Gwlff".

Fe wnaeth hi wrthod dweud os oedd hi eisiau gweld y Prif Weinidog yn ymuno gyda Llafur Cymru wrth iddyn nhw ymgyrchu ar gyfer etholiad y Senedd yn ystod yr wythnosau nesaf.

Mae'r polau piniwn wedi bod yn dangos yn gyson mae Plaid Cymru a Reform sydd ar y blaen gyda phôl piniwn YouGov ar gyfer ITV Cymru yn rhoi Llafur yn drydydd.

"Yr hyn dwi eisiau iddo fe wneud yw canolbwyntio ar geisio datrys y sefyllfa yn y Dwyrain Canol. Dyna'r ffordd orau i helpu pobl Cymru er mwyn dod a'r prisiau yna lawr," meddai Eluned Morgan.