Mae'r archifydd, ymchwilydd ac awdur cerddoriaeth Gari Melville wedi marw yn 70 oed.

Roedd yn gyfrifol am gasgliad yr Archif Roc a Phop Cymru, sef prosiect archifol er mwyn casglu a diogelu deunydd yn ymwneud â cherddoriaeth Cymru.

Fe aeth i Ysgol Uwchradd Cwmtawe ym Mhontardawe ac astudiodd Ddiwinyddiaeth a Chymdeithaseg ym Mhrifysgol Hull rhwng 1974 ac 1978.

Ar ôl graddio o'r brifysgol roedd yn gweithio fel archifydd yn HTV yn yr 1980au, gan yna ymuno â rhaglen Heno ar S4C fel ymchwilydd cerddoriaeth.

Roedd hefyd yn ymchwilydd ac ymgynghorydd llawrydd a bu'n gyd-olygydd y gyfrol Caniadau, cofnod cynhwysfawr o waith y cerddor Meic Stevens.

Ar gyfer dathliadau 40 mlwyddiant y label cerddoriaeth Fflach yn 2021, bu'n chwilio drwy ei gasgliad o recordiau i lunio rhestr o’r hoff ganeuon gan y label.

Roedd yn byw ym Mhontardawe gyda'i wraig Nia Melville, a fu'n cyflwyno'r sioe gerddoriaeth Heno Bydd yr Adar yn Canu ar Radio Cymru.

Mewn neges ar y cyfryngau cymdeithasol, dywedodd ei ferch, Tanglwst Melville, bod ei thad wedi marw ddydd Mawrth.

"Dwi'n rhannu y newyddion trist fod bu farw ein tad, Gari, yn oriau mân y bore ar y 9fed o Rhagfyr," meddai mewn datganiad ar gyfryngau cymdeithasol.

"Odd fi a fy mhrawd, Griffri, wrth eu ochr drwy gydol yr amser ac er ei fod yn golled ofnadwy i'r ddwy ohonom, mae gennym heddwch drwy wybod fod odd Dad wedi'i amgylchynu a chariad yn ystod ei eiliadau olaf.

"Hoffwn Griff a finnai rhoi diolch i'r staff Ysbyty Morriston am eu cefnogaeth dros yr wythnosau cyn ei farwolaeth.

"Diolch am cadw ein teulu yn eich meddyliau yn ystod yr amser anodd hwn."