Mae aelodau Your Party wedi pleidleisio i beidio â chael arweinydd unigol ar y blaid.

Pleidleisiodd cynhadledd gyntaf y blaid adain chwith yn Lerpwl o 51.6% y dylai'r blaid gael ei harwain gan bwyllgor o aelodau.

Mewn pleidlais ar wahân cytunodd y gynhadledd hefyd i ganiatáu i aelodau o bleidiau eraill “sy’n cyd-fynd â gwerthoedd y blaid” i ymuno â Your Party.

Daw hynny wedi ffrae dros ddiarddel aelodau o Blaid Sosialaidd y Gweithwyr (SWP) o Your Party.

Dywedodd llefarydd ar ran Your Party: “Mae’r bleidlais hon yn dangos ein bod ni wir yn gwneud gwleidyddiaeth yn wahanol: o’r gwaelod i fyny, yn hytrach nag o’r brig i lawr.

“Yn San Steffan mae gennym ni ddosbarth gwleidyddol proffesiynol sydd wedi’i ddatgysylltu fwyfwy oddi wrth bobl gyffredin.

“Maen nhw’n gwasanaethu corfforaethau a biliwnyddion yn hytrach na’r cymunedau y maen nhw i fod i’w cynrychioli.

“Gyda phlaid sy’n cael ei harwain gan aelodau go iawn, byddwn ni’n cynnig rhywbeth gwahanol: democratiaeth atebol ar lawr gwlad.”

Y cefndir

Ym mis Gorffennaf fe wnaeth yr AS Zarah Sultana gyhoeddi ei bod yn gadael y Blaid Lafur er mwyn ffurfio plaid wleidyddol newydd gyda chyn arweinydd y Blaid Lafur, yr AS annibynnol, Jeremy Corbyn (uchod).

Ond mae Your Party wedi gweld ffraeo mewnol sylweddol ers hynny ac mae dau o’r ASau oedd yn cefnogi ffurfio’r blaid, Iqbal Mohamed a Adnan Hussain, bellach wedi gadael y mudiad.

Dywedodd Zarah Sultana ei bod wedi boicotio diwrnod cyntaf cynhadledd y blaid ddydd Sadwrn.

Roedd hi’n feirniadol meddai o’r modd yr oedd aelodau pleidiau eraill wedi eu diarddel o’r blaid, meddai.

Dywedodd Jeremy Corbyn wrth newyddiadurwyr ddydd Sadwrn ei fod yn ffafrio un arweinydd ac yn ei fod yn debygol o sefyll am y rôl.

Ond dywedodd Zarah Sultana y byddai'n pleidleisio dros arweinyddiaeth gyfunol ac nad oedd hi'n credu y dylai pleidiau gael eu harwain gan "bersonoliaethau unigol".

Llun: Jeremy Corbyn yn y gynhadledd.