Mae'n bosib y gallai glaw trwm achosi llifogydd mewn rhai ardaloedd wrth i'r Swyddfa Dywydd gyhoeddi rhybudd tywydd oren ar gyfer de Cymru drwy'r dydd ddydd Llun.

Gallai cartrefi a busnesau ddioddef llifogydd gan achosi difrod i rai adeiladau, medden nhw.

Bydd rhybudd melyn am law hefyd mewn glaw nes 03.00 ddydd Mawrth a fydd yn effeithio ar bob sir yng Nghymru heblaw am Sir y Fflint a Wrecsam.

Dywedodd y Swyddfa Dywydd fod disgwyl i fand o law trwm symud dros dde Cymru rhwng diwedd ddydd Sul a phrynhawn Llun, gyda rhagolygon y gallai hyd at 20 i 30 mm (0.78 modfedd i 1.97 modfedd) o law gwympo ar draws y rhanbarth.

Cafodd rhybudd cynharach am law trwm ddydd Sadwrn ei godi gan y Swyddfa Dywydd.

Daw'r rhybudd ar gyfer ddydd Llun gwta bythefnos ar ôl i rybuddion 'perygl i fywyd' fod mewn grym yn dilyn Storm Claudia.

Mae'r Swyddfa Dywydd yn rhybuddio fod disgwyl gwyntoedd cryfion i gyd-fynd â'r glaw trwm ddydd Llun, yn enwedig mewn ardaloedd arfordirol.

"Mae'n debygol y byddai'r glaw trwm yn achosi trafferthion, ac mae llifogydd yn bosibl," meddai'r rhybudd.

Mae disgwyl y bydd gwasanaethau trên a bysiau yn cael eu heffeithio, ac fe allai amodau gyrru fod yn anodd gyda rhai ffyrdd ar gau.

Mae'n bosibl y bydd rhai ardaloedd hefyd yn colli cyflenwadau trydan, rhybuddiodd y Swyddfa Dywydd.

Bydd y rhybydd tywydd oren yn effeithio ar y siroedd canlynol:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Merthyr Tudful
• Sir Fynwy
• Castell-nedd Port Talbot
• Casnewydd
• Sir Benfro
• Powys
• Rhondda Cynon Taf
• Abertawe
• Torfaen
• Bro Morgannwg