Mae’r Arlywydd Donald Trump wedi cyhoeddi ddydd Mercher ei fod wedi arwyddo mesur yn gorfodi cyhoeddi dogfennau yn ymwneud â’r troseddwr rhyw Jeffrey Epstein.

Bydd yn golygu rhyddhau’r holl ddogfennau, negeseuon a deunyddiau ymchwiliadol sy’n gysylltiedig â’r pedoffeil Jeffrey Epstein o fewn 30 diwrnod.

Roedd yn newid safbwynt gan yr Arlywydd oedd wedi cefnogi galwadau i beidio rhyddhau'r dogfennau yn y gorffennol.

Roedd dioddefwyr Epstein wedi galw ar y ddwy siambr i ryddhau’r ffeiliau.
Fe bleidleisiodd Tŷ’r Cynrychiolwyr yn ysgubol o blaid y mesur, 427 i 1, ddydd Mawrth.

Wrth siarad nos Lun, dywedodd Trump nad oedd gan y Gweriniaethwyr “ddim i’w wneud ag Epstein”.
“Mae’n broblem i’r Democratiaid mewn gwirionedd,” meddai. “Roedd y Democratiaid yn ffrindiau i Epstein, pob un ohonyn nhw.”

Dywedodd un o awduron y mesur, y Cyngreswr Gweriniaethol Thomas Massie, fod ganddo bryderon ynghylch rhai ffeiliau’n cael eu dal yn ôl.

“Rwy’n pryderu bod [Trump] yn agor cyfres o ymchwiliadau, ac rwy’n credu y gallent fod yn ceisio defnyddio’r ymchwiliadau hynny fel sail i beidio â rhyddhau’r ffeiliau,” meddai.

“Dyna fy mhryder i.”

‘Naratif ffug’

Wythnos diwethaf fe gyhoeddodd Democratiaid sy’n aelodau o bwyllgor craffu Tŷ’r Cynrychiolwyr gyfres o e-byst oedd yn cynnwys rhai rhwng Epstein, Ghislaine Maxwell ac eraill.
Mae Maxwell yn y carchar am fasnachu pobl ar gyfer rhyw ac fe wnaeth Epstein ladd ei hun yn 2019 tra yn y carchar.

Mae’r e-byst gan Jeffrey Epstein yn dweud bod Trump “yn gwybod am y merched, ac wedi gofyn i Ghislaine stopio”. Nid yw’n eglur at beth mae hynny’n cyfeirio.

Doedd yr Arlywydd Trump heb dderbyn nac anfon unrhyw un o’r negeseuon, a oedd yn dyddio’n bennaf i’r cyfnod cyn iddo fod yn arlywydd.
Nid yw Donald Trump wedi cael ei gyhuddo o unrhyw gamwedd troseddol mewn cysylltiad ag Epstein na Maxwell.

Fe ddywedodd y Gweriniaethwyr fod y Democratiaid wedi ceisio “creu naratif ffug i danseilio’r Arlywydd Trump” a’u bod wedi “dewis a dethol” dogfennau i’w rhyddhau.