Bydd darluniau’r awdur Roald Dahl yn cael eu gwerthu'r wythnos hon ar ôl iddynt gael eu darganfod mewn hen amlen. 

Cafodd brasluniau gwreiddiol Dahl eu canfod y tu mewn i amlen. Ei gyd-weithiwr, Ian Craig, oedd yn berchen ar yr amlen ac fe fuodd farw yn 2023. 

Roedd Roald Dahl yn enedigol o Landaf yng Nghaerdydd ac fe fuodd farw yn 74 oed yn 1990. 

Roedd Dahl wedi creu’r gwaith celf drwy ddefnyddio beiro du, a hynny ar gyfer ei hunangofiant Boy a gafodd ei gyhoeddi yn 1984. 

Dyma oedd yr unig dro i’r awdur ddefnyddio gwaith celf ei hun yn un o’i lyfrau. 

Image

Image

Image

Fe fydd y brasluniau nawr yn cael eu gwerthu fel rhan o arwerthiant Lyon & Turnbull yng Nghaeredin, Yr Alban ddydd Mercher. 

Y gred yw y byddan nhw’n cael eu gwerthu am bris rhwng £20,000 a £30,000. 

Yn ei hunangofiant, mae’r awdur yn cofio am sawl antur y cafodd ef a’i ffrindiau fel bechgyn ifanc – gan gynnwys rhoi corff llygoden oedd wedi marw y tu fewn i jar losin yn y siop losin lleol. 

Mae wedi tynnu braslun llygoden yn gorwedd ar ben losin gyda’i goesau yn yr awyr i gyfleu’r foment yma. 

Roedd Dahl yn cydweithio gyda chwmni cyhoeddi llyfrau Jonathan Cape ar y llyfr Boy. Ian Craig oedd cyfarwyddwr celf cwmni Jonathan Cape adeg hynny. 

Roedd Quentin Blake, sydd yn adnabyddus am ei waith celf yn llyfrau Roald Dahl ar ei wyliau ar y pryd.

Lluniau: Roald Dahl (Wikipedia); brasluniau Roald Dahl (Lyon & Turnbull)