Mae Prif Weinidog Awstralia, Anthony Albanese wedi ei ail ethol ar ôl ennill yr etholiad cyffredinol yno, gan gynyddu ei fwyafrif. 

Yn cynrychioli'r canol chwith, sicrhaodd ei blaid ddigon o bleidleisiau i guro Peter Dutton a oedd yn arwain y Glymblaid Ryddfrydol Genedlaethol.

Ar ôl ei chynrychioli hi am 24 mlynedd, collodd Peter Dutton ei sedd ei hun. 

Er na fydd y cyfrif pleidleisiau wedi dod i ben am rai dyddiau eto, mae Mr Dutton eisoes wedi ildio.  

Y gred yw y bydd gan lywodraeth newydd Awstralia 86 o seddi, y Glymblaid â 39, tra bydd gan y Blaid Werdd un neu ddwy sedd. 

Ar ddechau'r ymgyrch etholiadol bum wythnos yn ôl, roedd hi'n agos iawn rhwng y ddwy brif blaid. 

Ymhlith y prif bynciau llosg, roedd costau byw, cyfundrefn iechyd sy'n dirywio a thai anfforddiadwy. 

Mae arlywyddiaeth Donald Trump a'i gynlluniau i godi tariff ar fewnforion i America hefyd wedi bod yn bwnc trafod cyson yn ystod yr ymgyrch etholiadol.   

Mae Prif Weinidog y Deyrnas Unedig, Syr Keir Starmer wedi llongyfarch Anthony Albanese ar ei fuddugoliaeth. 

“Mae'r Deyrnas Unedig ac Awstralia mor agos ag erioed - sy'n profi y gall cyfeillgarwch o bellter fod y cryfaf," meddai.  

“Rwy'n gwybod y byddwn yn parhau i weithio gyda'n gilydd yn cyflawni yr un dyheadau, ym maes masnach, buddsoddi ac ynni, gan geisio sicrhau bywyd gwell i bobl sy'n gweithio yn y Deyrnas Unedig ac Awstralia," ychwanegodd.  

Llun: Stefan Rousseau/PA Wire