Mae cwest wedi clywed bod dynes o’r Wyddgrug wedi marw mewn seiclon tra'r oedd hi'n teithio yn Awstralia fis diwethaf. 

Roedd Eleanor Thompson, 35 oed o Ffordd Rhuthun, yn treulio cyfnod yn teithio yn y wlad ar ei phen ei hun mewn fan wersylla pan darodd Seiclon Alfred. 

Wrth agor y cwest yn Rhuthun ddydd Llun, dywedodd Uwch Grwner Dwyrain a Chanol Gogledd Cymru, John Gittins, bod Ms Thompson yn Burringbar, De Awstralia, pan darrodd y storm ar 8 Mawrth. 

Roedd yr awdurdodau lleol wedi rhybuddio pobl i beidio â mynd tu allan adeg y storm. 

Roedd tad Ms Thompson yn cael ar ddeall bod ei ferch mewn ardal anghysbell ar y pryd ac yn ceisio chwilio am loches, medd Mr Gittins.

“Y gred yw ei bod wedi gadael y fan ac mae’n bosib fod y cerbyd wedi rholio gan achosi anafiadau iddi,” meddai. 

Cafodd archwiliad post-mortem ei gynnal yn Awstralia. Yn ôl canlyniadau’r post-mortem, “anafiadau lluosog” oedd achos ei marwolaeth. 

Dywedodd y Crwner y bydd yn rhaid cynnal cwest gan fod corff Ms Thompsan bellach wedi'i ddychwelyd i Gymru. 

Ond ychwanegodd bod angen cynnal ymholiadau pellach ac yn sgil hynny fe allai fod yn gryn amser cyn cynnal gwrandawiad cwest llawn. 

Roedd tua 290,000 o gartrefi heb bŵer yn ystod Seiclon Alfred ac fe gafodd gwyntoedd o hyd at 100mya eu cofnodi.