Mae dyn 24 oed wedi cael ei arestio mewn cysylltiad ag ymosodiad difrifol yn Rhuthun.

Dywedodd Heddlu Gogledd Cymru fod dyn wedi dioddef anafiadau difrifol i'w ben yn ystod y digwyddiad yn Sgwâr San Pedr yng nghanol y dref am 02.00 ar 19 Ionawr.

Ychwanegodd DC Sion Phillips o'r llu fod y dyn mewn cyflwr difrifol yn yr ysbyty o ganlyniad i'r anafiadau.

"Mae ein hymchwiliad i'r digwyddiad yn parhau ac rydym yn archwilio lluniau cylch cyfyng er mwyn cynorthwyo'r ymchwiliad hwnnw," meddai.

"Mae'r dyn 24 oed a gafodd ei arestio wedi cael ei ryddhau ar fechnïaeth amodol wrth i'n hymholiadau parhau.

"Rydym yn awyddus i siarad gydag unrhyw un oedd o gwmpas Sgwâr San Pedr yn oriau mân y bore 19 Ionawr a fyddai wedi gweld y digwyddiad."

Fe allai unrhyw un sydd gyda gwybodaeth yn gallu cysylltu gyda Heddlu Gogledd Cymru ar-lein neu drwy ffonio 101 a dyfynnu'r cyfeirnod 25000048679.