Mae disgwyl tywydd garw ar draws Cymru ddydd Sadwrn a dydd Sul wrth i Storm Bert effeithio ar ran helaeth o'r wlad.

Mae rhybudd melyn am wyntoedd cryfion a glaw trwm mewn grym dros y penwythnos.

Daw hynny wedi rhybudd am rew ac eira ddydd Iau a dydd Gwener.

Mae'r rhybudd melyn yn ei le ar gyfer siroedd Caerfyrddin, Ceredigion, Conwy, Sir Ddinbych, Sir y Fflint, Gwynedd, Môn, Sir Benfro, Powys a Wrecsam.

Mae yna rybudd am wynt rhwng 09:00 ddydd Sadwrn a 21:00 ddydd Sul ym Mhen-y-bont, Caerdydd, Sir Gaerfyrddin, Castell-nedd Port Talbot, Sir Benfro, Rhondda Cynon Taf, Abertawe a Bro Morgannwg.

Bydd rhybudd melyn am law hefyd mewn grym rhwng 06:00 ddydd Sadwrn a 06:00 dydd Sul ar gyfer y rhan fwyaf o’r wlad ag eithrio Ynys Môn a Sir y Fflint.

Dywedodd llefarydd ar ran y Swyddfa Dywydd fod disgwyl i fis o law ddisgyn mewn mannau o Gymru ddydd Sadwrn.

Mae’n bosib fydd lefel afonydd yn codi’n sydyn yn enwedig yn dilyn yr eira yn gynharach yn yr wythnos.

Mae’r bosib fydd ffyrdd yn cau a bydd amharu ar gyflenwadau trydan.

Mae Cyfoeth Naturiol Cymru wedi cyhoeddi nifer o rybuddion melyn am lifogydd fore dydd Sadwrn yn effeithio ar yr afonydd canlynol:

Tawe Uchaf

Tywi Uchaf

Hafren Isaf

Efyrnwy

Llwchwr ac Aman

Gogledd a gorllewin Sir Benfro

Nant Barrog yn Llanfair Talhaearn

Dalgylchoedd Elwy a Gele

Dalgylchoedd Glaslyn a Dwyryd

Dalgylch Conwy

Mawddach ac Wnion

Gwendraeth Fawr a Fach

Wysg

Gwy ym Mhowys

Rhymni

Ebwy, Sirhywi a Llwyd

Cynon

Taf