Mae plentyn wedi cael ei anafu ar ôl ymosodiad gan gi yn ardal Llandudno, Sir Conwy.

Cafodd Heddlu Gogledd Cymru eu galw i gyfeiriad yng Nghyffordd Llandudno brynhawn dydd Iau.

Roeddent yn ymateb i adroddiad fod plentyn wedi ei anafu gan gi.

Fe gafodd y plentyn ei gludo i’r ysbyty. 

Dywedodd y llu bod swyddogion arbenigol wedi cymryd y ci, a’i ddifa. 

Dyw'r heddlu ddim wedi cadarnhau union frid y ci.

Ychwanegodd llefarydd ar ran Heddlu Gogledd Cymru: “Mae ymchwiliad i amgylchiadau’r digwyddiad hwn yn parhau.”