Mae gyrrwr beic cwad wedi marw mewn gwrthdrawiad ar ffordd rhwng Llandderfel a Llandrillo ger ffin Gwynedd a Sir Ddinbych ddydd Sul.

Y beic cwad Honda oedd yr unig gerbyd yn y gwrthdrawiad ar ffordd y B4401 am 19.01 nos Sul.

Cafodd y gwasanaethau brys eu galw i'r lleoliad, ond er gwaethaf eu hymdrechion bu farw'r gyrrwr yn y fan a'r lle.

Mae ei berthnasau agosaf a'r crwner wedi cael gwybod. 

Cafodd y ffordd ei chau am sawl awr yn dilyn y digwyddiad er mwyn caniatáu i'r heddlu ymchwilio.

Dywedodd y Rhingyll Duncan Logan o Heddlu Gogledd Cymru: "Rwy'n cynnig fy nghydymdeimlad dwysaf i deulu'r dyn yn yr amser anodd hwn. 

"Mae'r digwyddiad hwn bellach yn cael ei ymchwilio, yn anffodus, fel gwrthdrawiad traffig ffordd angheuol. 

"Rydym yn gofyn i unrhyw un a allai fod â thystiolaeth - gan gynnwys lluniau CCTV, dashcam neu ffôn symudol - neu a oedd yn cerdded neu’n teithio yn yr ardal, i gysylltu â ni."

Dylai unrhyw un sydd â gwybodaeth gysylltu â swyddogion yr Uned Troseddau Ffyrdd, gan ddyfynnu’r cyfeirnod 26000350452.