Cafodd beiciwr modur ei anafu'n ddifrifol mewn gwrthdrawiad ger Dinas Mawddwy yng Ngwynedd bnawn Sadwrn.

Dywedodd Heddlu Gogledd Cymru eu bod wedi eu galw i'r gwrthdrawiad am 15:15 ar ffordd yr A470.

Roedd y gwrthdrawiad rhwng car rali Ford Cortina coch a beic modur Triumph Tiger llwyd.

Fe wnaeth gyrrwr y beic modur ddioddef anafiadau difrifol ac fe gafodd ei gludo mewn hofrennydd i ysbyty yn Stoke, lle mae'n parhau i gael triniaeth.

Mae'r Rhingyll Alun Jones o'r Uned Troseddau Ffyrdd wedi apelio am dystion.

Dywedodd mewn datganiad bnawn Sul: "Rydym yn annog unrhyw un a welodd y gwrthdrawiad, neu a oedd yn teithio yn yr ardal ar y pryd ac a allai fod â lluniau camera dangosfwrdd, i gysylltu â ni."

Gall unrhyw un sydd gyda gwybodaeth am y gwrthdrawiad gysylltu gyda'r heddlu drwy eu gwefan, neu ffonio 101 gan ddyfynnu'r cyfeirnod O092002.

Llun: Google