Diwrnod olaf o streicio yn effeithio ar wasanaethau trên yng Nghymru
Diwrnod olaf o streicio yn effeithio ar wasanaethau trên yng Nghymru
Bydd trenau ar stop ar hyd Cymru am y trydydd tro mewn wythnos ddydd Sadwrn.
Mae Undeb RMT wedi bod yn cynnal y gweithredu diwydiannol yn dilyn anghydfod gyda Network Rail dros gyflogau ac amodau gwaith staff.
Er nad oes anghydfod rhwng yr undeb a Thrafnidiaeth Cymru yn uniongyrchol, nid oes modd cynnal gwasanaethau gan mai Network Rail sy'n gyfrifol am seilwaith y rheilffyrdd.
Dim ond tua 20% o wasanaethau fydd yn rhedeg ar draws rhwydwaith Network Rail ar ddiwrnodau'r streic.
Yma yng Nghymru, mae'r holl wasanaethau trên wedi eu hatal oni bai am rai gwasanaethau cyfyngedig yn y de.
Dywedodd Trafnidiaeth Cymru fod gwasanaeth cyfyngedig rhwng Radyr â Threherbert, Aberdâr a Phontypridd.
Cafodd y streic ei chynnal ddydd Mawrth a dydd Iau gan arwain at olygfeydd o orsafoedd trenau gwag ar hyd y wad.
Bydd diwrnod olaf y streicio yn digwydd ddydd Sadwrn ond mae Trafnidiaeth Cymru wedi rhybuddio am oedi ar y rhwydwaith drwy gydol yr wythnos.
Mae Llywodraeth y DU a Chadeirydd Grŵp Darparu'r Rheilffyrdd wedi galw ar Undeb RMT i ddod â'r streic fwyaf ers y 1970au i ben.
Dywed RMT eu bod nhw'n awyddus i drafod er mwyn dod o hyd i ddatrysiad.
Llun: Trafnidiaeth Cymru