Dyn lleol 28 oed wedi marw mewn gwrthdrawiad ger Llangefni
Mae Heddlu Gogledd Cymru'n apelio am wybodaeth ar ôl i ddyn farw ac un arall gael ei anafu'n ddifrifol mewn gwrthdrawiad ar Ynys Môn nos Iau.
Cafodd swyddogion eu galw ychydig wedi 17:30 i'r gwrthdrawiad un cerbyd ar ffordd yr A5 rhwng Rhostrehwfa a Thyrpeg Nant ar gyrion Llangefni.
Aeth y gwasanaethau brys i gynorthwyo ond bu farw gyrwr y car, Seat Leon llwyd, yn y fan a'r lle.
Cafodd teithiwr arall yn y car, dyn lleol 25 oed, ei gludo i Ysbyty Gwynedd cyn cael ei symud i ysbyty yn Stoke gydag anafiadau difrifol allai newid ei fywyd.
Dywedodd Sarjant Meurig Jones o Uned Blismona'r Ffyrdd: "Mae ein cydymdeimlad dwysaf gyda theulu'r dyn ar yr adeg anodd yma.
"Mae'r ymchwiliad i geisio darganfod beth ddigwyddodd wedi cychwyn. Rydym yn credu fod y Seat Leon wedi teithio ar ffordd yr A4080 o ardal Tŷ Croes ac yna ar y B4422 gan deithio drwy Llangadwaladr, Bethel a Llangristiolus.
"Yna fe aeth ar hyd yr A5 cyn taro wal ac i mewn i gae cyfagos.
“Rydym yn apelio ar unrhyw un a allai fod wedi bod yn teithio ar hyd y daith yma ac a allai fod wedi gweld y Seat Leon cyn y gwrthdrawiad, neu i unrhyw un a allai fod wedi bod yn yr ardal ac a allai fod â lluniau dash-cam, i gysylltu gyda ni cyn gynted â phosib.”
Mae'r heddlu'n gofyn i unrhyw un sydd â gwybodaeth i gysylltu dros y we neu drwy ffonio 101 gan ddyfynnu cyfeirnod 21000837019.