Mae angen "ystyried" cau ysgolion am yr wythnos olaf cyn gwyliau'r Nadolig, yn ôl arweinydd Cyngor Gwynedd.

Dywedodd Dyfrig Siencyn fod ffigyrau Covid-19 y sir "yn ddychrynllyd" ac y byddai hyn yn rhoi "toriad bach cyn i ni gyd ddechrau cymdeithasu gyda'n gilydd dros 'Dolig".

Ychwanegodd wrth raglen Dros Frecwast ar BBC Radio Cymru fod hi'n ymddangos bod y feirws yn "lledaenu trwy'r ysgolion a trwy gymdeithasu tu allan i ysgolion".

Ond, fe ddywedodd y Cynghorydd Siencyn ei bod hi'n "rhaid dilyn y cyngor gwyddonol" wrth wneud penderfyniadau o'r fath.

Dywed Llywodraeth Cymru fod fframwaith wedi ei chyflwyno i alluogi cynghorau sir i symud i ddysgu cyfunol ar lefel awdurdodau lleol neu ysgol.

'Cyrraedd y pegwn'

Dywedodd yr Arweinydd hefyd nad oedd yn rhagweld y byddai unrhyw gyfyngiadau lleol yn cael eu cyflwyno yn yr ardal i gyfyngu ar ledaeniad y feirws.

Gwynedd yw'r sir â'r gyfradd uchaf o achosion Covid-19 yng Nghymru ar hyn o bryd.

Rhwng 21 a 27 Tachwedd, roedd 837.3 achos i bob 100,000 o'r boblogaeth.

Mae'r gyfradd o achosion ar draws Gymru ar gyfartaledd yn 464.5 achos i bob 100,000 o bobl.

"Mae'r darogan yn deud bo ni 'di cyrraedd y pegwn a 'dan ni'n gobeithio byddwn i'n gweld gostyngiadau 'lly", meddai'r Cynghorydd Siencyn.

'Lleihau unrhyw amhariad'

Dywedodd llefarydd ar ran Llywodraeth Cymru: "Dylid gwneud penderfyniadau i symud i ddysgu cyfunol ar lefel ysgol ac Awdurdod Lleol, sydd wedi'u llywio gan gyngor ac ystyriaethau iechyd a diogelwch, megis lefelau staffio, er mwyn lleihau unrhyw amhariad ar ddysgwyr.

"Rydym am wneud popeth o fewn ein gallu i darfu cyn lleied a phosib ar addysg a gofal plant. I gefnogi hyn, rydym wedi cyhoeddi fframwaith rheoli heintiau lleol, i helpu ysgolion i weithredu'n ddiogel a theilwra ymyriadau i adlewyrchu lefel y risg lleol.

"Mae'r Fframwaith yn rhoi canllawiau i ysgolion ar y broses a ddylai ddigwydd pe bai cynnydd mewn risg neu gynnydd mewn achosion."

Pwysleisiodd y Cynghorydd Siencyn bwysigrwydd cymryd camau gofalus gan gynnwys golchi dwylo, gwisgo mwgwd a chadw pellter cymdeithasol.