Mae’r Swyddfa Dywydd wedi cyhoeddi rhybudd melyn am wyntoedd cryfion ar gyfer rhannau o arfordir gorllewinol a gogledd Cymru ar ddechrau’r wythnos.

Mae disgwyl i wyntoedd o’r de i’r de orllewin gryfhau yn ystod dydd Llun cyn i’r rhybudd ddod i rym rhwng 22.00 ddydd nos Lun a 16:00 ddydd Mawrth.

Gallai'r gwyntoedd achosi hyrddiadau rhwng 40 a 50 milltir yr awr, gyda rhai mannau arfordirol a thir uchel yn debygol o wynebu gwyntoedd dros 70 milltir yr awr dros ogledd orllewin Cymru.

Mae’r Swyddfa Dywydd yn rhybuddio y gallai’r storm achosi difrod i adeiladau ac effeithio ar gyflenwadau pŵer.

Ychwanegodd y gallai hefyd effeithio ar drafnidiaeth.

Mae’r rhybudd yn effeithio ar y siroedd canlynol yng Nghymru:

• Abertawe
• Caerfyrddin
• Ceredigion
• Conwy
• Dinbych
• Gwynedd
• Sir Benfro
• Powys
• Ynys Môn

Mae'r Swyddfa Dywydd hefyd wedi ymestyn eu rhybudd melyn am law trwm rhwng 18:00 nos Lun a 18:00 dydd Mawrth i gynnwys siroedd Conwy, Dinbych, Gwynedd a Wrecsam.