Bydd pobl ifanc ar fudd-daliadau yn cael cynnig gwaith ym meysydd lletygarwch ac adeiladu mewn ymgais i atal y cynnydd mewn diweithdra ymysg pobl ifanc.

Mae gweinidogion Llywodraeth y DU wedi cyhoeddi pecyn gwerth £820 miliwn i roi cymorth i bobl ar fudd-daliadau gael swyddi.

Mae'r arian yn cynnwys cyllid ar gyfer hyfforddiant a phrofiad gwaith ym meysydd adeiladu, lletygarwch, iechyd a gofal cymdeithasol i 350,000 o bobl ifanc ar gredyd cynhwysol.

Fe fydd rhai pobl ifanc yn derbyn "cymorth dwys" i'w helpu dod o hyd i swyddi, ond mae'r llywodraeth yn dweud bod y rhai sydd yn gwrthod cyd-weithio heb reswm da o bosib yn colli rhai o'u budd-daliadau.

Credir i rai o'r swyddi gael eu creu yn ne Cymru, gydag eraill yn Birmingham, Manchester, Essex a chanolbarth yr Alban.

'Cyfle i lwyddo'

Dywedodd y Gweinidog Gwaith a Phensiynau, Pat McFadden y byddai pobl ifanc yn gwneud y swyddi yma gyda'r gefnogaeth gywir.

"Mae pobl person ifanc yn haeddu cyfle teg i lwyddo," meddai.

"Pan maen nhw'n derbyn y cymorth a chyfleoedd cywir, maen nhw'n gwneud y mwyaf ohono."

Daw'r cyhoeddiad yma wrth i nifer y bobl ifanc rhwng 16-25 oed sydd ddim mewn swydd, addysg neu hyfforddiant gynyddu i 940,000.

Mae hynny'n gynnydd o 195,000 dros y ddwy flynedd diwethaf.

Dywedodd Mr McFadden fod y cyllid newydd yn “flaendal ar ddyfodol pobl ifanc a dyfodol y wlad, gan greu llwybrau go iawn i swyddi da a darparu profiad gwaith, hyfforddiant sgiliau a chyflogaeth".

Mae disgwyl i gynlluniau pellach ar gyfer pobl ifanc gael eu cyhoeddi yn yr wythnos nesaf wrth i’r llywodraeth baratoi i gyhoeddi eu strategaeth ieuenctid cenedlaethol.

Dywedodd Helen Whately, ysgrifennydd gwaith a phensiynau cysgodol y Ceidwadwyr: “Mae codiadau treth y Canghellor yn cynyddu diweithdra ymhlith pobl ifanc, gan gymryd gyrfa oddi wrth genhedlaeth o bobl ifanc.

“Mae hwn yn gyfaddefiad nad oes gan y llywodraeth gynllun ar gyfer twf, dim cynllun i greu swyddi go iawn, a dim ffordd o fesur os yw unrhyw ran o’r arian hwn yn cyflawni canlyniadau.

“Ni all gweinidogion ddweud beth yw’r rolau, pwy fydd y cyflogwyr, na faint o swyddi fydd yn dal i fodoli unwaith y bydd y cyllid yn dod i ben.”