Mae’r BBC wedi ymddiheuro ar ôl i’w ap tywydd ddweud bod corwynt yn taro’r Deyrnas Unedig.

Fore dydd Iau roedd yr ap yn dangos neges ‘Gwyntoedd lefel corwynt’ yng Nghymru a rhannau eraill o’r DU.

Roedd neges yn nodi: “Rydym yn cael problemau gyda'n data rhagolygon. Rydym yn gweithio i'w ddatrys.”

Dywedodd y gorfforaeth eu bod nhw’n “ymddiheuro” am y gwall.

Mewn neges ar wefan X, Twitter gynt, dywedodd y meteorolegydd Matt Taylor: “Peidiwch â phoeni, bobl - nid yw Corwynt Milton wedi dod i’r DU!

“Mae gwall data wedi bod rhwng ein cyflenwyr a’r ap/ar-lein. Mae pobl yn gweithio i ddatrys y broblem.

“Does dim angen mynd i banig a phrynu pren a chanhwyllau.”