Llwyddiant Dal y Mellt yn 'dangos beth sy'n bosib' trwy'r Gymraeg
Llwyddiant Dal y Mellt yn 'dangos beth sy'n bosib' trwy'r Gymraeg
Mae cyhoeddwr llyfrau yn dweud fod llwyddiant cyfres Dal y Mellt yn "dangos beth sy'n bosib" wrth ysgrifennu nofelau trwy gyfrwng y Gymraeg.
Fe wnaeth S4C gyhoeddi wythnos diwethaf fod yr hawliau ar gyfer y ddrama trosedd wedi'u gwerthu i Netflix.
Dyma fydd y tro cyntaf i gyfres uniaith Cymraeg gael ei ffrydio ar y platfform, gan ddod ar gael i wylwyr o fis Ebrill ymlaen.
Ond nid yn unig y diwydiant teledu yng Nghymru sydd yn buddio o'r newyddion, yn ôl pennaeth cyhoeddi gwasg llyfrau Y Lolfa.
Dywedodd Lefi Gruffudd fod llwyddiant Dal y Mellt, sydd yn seiliedig ar y llyfr o'r un enw gan Iwan 'Iwcs' Roberts, hefyd yn hwb i awduron.
"Dwi feddwl mai'n rhywbeth i bobl sylweddoli mae modd neud hyn [ysgrifennu llyfrau] yn Gymraeg," meddai.
"Sdim rhaid i'r cynnyrch gwreiddiol fod yn Saesneg er mwyn cyrraedd y farchnad yna.
"Does dim arian mawr i wneud yn ysgrifennu yn y Gymraeg, ond mae hwn yn sicr yn dangos y potensial i ddatblygu yn y ffordd 'na.
"Os yw'r cynnyrch yn dda, mae modd neud hyn yn y Gymraeg a chyrraedd marchnadoedd a chael incwm ychwanegol trwy hynny."
Yn ôl Mr Gruffudd, daw'r newyddion da ar gyfnod anodd i'r diwydiant llyfrau yng Nghymru.
Mae'r argyfwng costau byw yn taro Y Lolfa yn galed; nid yn unig oherwydd costau ynni uwch, ond mae pris papur wedi cynyddu gan 50% gan roi straen andwyol ar y busnes.
I gyd-fynd gyda chostau uwch, mae Y Lolfa wedi gweld gostyngiad yn ei gwerthiant dros y flwyddyn ddiwethaf wrth i bobl brynu llai o lyfrau.
Er gwaethaf yr heriau sydd yn wynebu'r wasg, mae Mr Gruffudd yn gweld llwyddiant Dal y Mellt fel tamaid o newyddion da yn ystod cyfnod anodd.
"Mae'n hawdd iawn i boeni ac yn mynd yn negyddol ynglŷn â gwerthiant sydd ddim wastad wedi bod yn gystal â disgwyl dros y flwyddyn ddiwethaf.
"Ond mae'n dangos bod y sgwennu yna a'r safon yna a bod y potensial i ddeunydd Cymraeg i gyrraedd ymhellach.
"Felly mae'n hwb i ni yn bendant."