Bydd Wrecsam yn herio Sheffield United ym mhedwaredd rownd Cwpan yr FA ddydd Sul.

Dyma'r tro cyntaf i'r clwb gyrraedd y bedwaredd rownd ers 2000, pan oeddynt wedi herio Cambridge United.

Wrecsam yw'r unig dîm o'r cynghreiriau di-gynghrair sydd dal yn y gystadleuaeth.

Fe wnaeth tocynnau i'r gêm yn y Cae Ras werthu allan 25 munud wedi iddynt fynd ar werth.

Dyma'r ail dro y bydd Wrecsam yn herio clwb o'r Bencampwriaeth yn y gystadleuaeth, wedi iddynt guro Coventry yn y rownd ddiwethaf.

Roedd goliau cynnar gan Sam Dalby ac Elliot Lee wedi rhoi Wrecsam ar y blaen gyda llai na 20 munud ar y cloc, cyn i Ben Sheaf sgorio i Coventry 10 munud cyn hanner amser.

Fe aeth Wrecsam 4-1 ar y blaen wedyn, ac wedi dal ar i sicrhau'r fuddugoliaeth er dwy gôl hwyr gan Coventry.

Cyfle i greu hanes

Os ydy Wrecsam yn gallu sicrhau buddugoliaeth yn erbyn Sheffied United ddydd Sul, dyna fydd y tro cyntaf i'r clwb gyrraedd y bumed rownd ers 43 o flynyddoedd.

Y tro diwethaf iddynt gyrraedd y bumed rownd oedd yn 1981 pan oeddynt wedi colli 3-1 oddi cartref i Wolverhampton Wanderers.

Roedd y clwb wedi cyrraedd yr un rownd y flwyddyn gynt, ond wedi colli 5-2 i Everton.

Mae tîm Phil Parkinson yn chwarae'n dda ar drothwy'r gêm, ac wedi cyrraedd brig y Gynghrair Genedlaethol wedi iddynt guro Gateshead.

Ond bydd yr her o'u blaenau yn un fawr gyda Sheffield United yn ail yn y Bencampwriaeth a heb golli yn y gynghrair ers 8 Tachwedd.

Maen nhw wedi ennill pedair o'u pum gêm ddiwethaf, ac yn gobeithio cyrraedd y bumed rownd am y trydydd tro ers 2020.

Er hyn, bydd cefnogwyr Wrecsam yn hyderus y byddant yn gallu curo United, a chyrraedd y bumed rownd.

Llun: CPD Wrexham