Newyddion S4C

Hyfforddwr Cymru, Warren Gatland. Llun gan URC

Warren Gatland i enwi ei garfan gyntaf ers dychwelyd fel hyfforddwr Cymru

NS4C 17/01/2023

Fe fydd Warren Gatland yn enwi ei garfan gyntaf ers dychwelyd fel hyfforddwr rygbi Cymru ddydd Mawrth, wrth i baratoadau ddechrau ar gyfer y Chwe Gwlad. 

Dyma fydd cyfle cyntaf y cefnogwyr i weld pa fath o newidiadau y bydd Gatland yn gwneud wedi iddo gymryd lle Wayne Pivac ym mis Rhagfyr. 

Cafodd Pivac ei ddiswyddo ar ôl cyfres o ganlyniadau gwael yn 2022, gan gynnwys colledion gartref i'r Eidal a Georgia. 

Gyda Gatland bellach nôl wrth y llyw fe fydd y cefnogwyr yn awyddus i weld ymgyrch gref yn y Chwe Gwlad. 

Daw'r bencampwriaeth eleni yn ystod cyfnod tyngedfennol i Gymru, nid yn unig oherwydd ailbenodiad Gatland. 

Mae Cwpan y Byd yn Ffrainc ar y gorwel, ac mae cwestiynau yn parhau o hyd am safon y timau rhanbarthol a'r strwythur rygbi yng Nghymru. 

Mae penderfyniadau Gatland ar gyfer yr ymgyrch nesaf, felly, yn teimlo'n bwysicach fyth o gymharu â charfannau cynt. 

Wynebau newydd

Yn ddiweddar, mae rhai wedi dweud y dylai chwaraewyr newydd gael cyfle yn y crys coch, wrth i nifer o'r garfan heneiddio. 

Mae rhai talentau ifanc eisoes wedi cael cyfle yn ystod gemau olaf Pivac, fel Rio Dyer a Joe Hawkins. 

Ond mae nifer eraill wedi serennu yn ystod tymor y Bencampwriaeth Rygbi Unedig eleni, gan gynnwys Keiran Williams, Mason Grady a Dan Davis. 

Os ydy Gatland yn dewis unigolion mwy amhrofiadol, pa chwaraewyr fydd yn cael eu hepgor? 

Y disgwyl yw y bydd cewri fel Alun Wyn Jones, Ken Owens neu Dan Biggar yn chwarae ond does dim sicrwydd y bydd pob chwaraewr profiadol yn cadw eu lle. 

Er hynny, mae yna restr hirfaith o chwaraewyr Cymru sydd wedi'u hanafu. 

Ni fydd Will Rowlands, Gareth Anscombe a Thomas Young ar gael ar gyfer y bencampwriaeth gyfan. 

Mae yna hefyd amheuon ynglŷn â faint o gemau y bydd Louis Rees-Zammit, Dillon Lewis a Ryan Elias yn medru chwarae. 

Penderfyniadau anodd i Gatland felly ac ar adeg lle mae yna bwysau aruthrol i wneud y dewisiadau cywir. 

This website uses cookies to ensure you get the best experience on our website.