Capten Cymru Siwan Lillicrap yn ymddeol o rygbi rhyngwladol
Capten Cymru Siwan Lillicrap yn ymddeol o rygbi rhyngwladol
Mae capten menywod Cymru, Siwan Lillicrap, wedi cyhoeddi ei bod yn ymddeol o rygbi rhyngwladol.
Mae'r blaenwr, sydd wedi chwarae yn yr ail reng a'r rheng ôl, wedi ennill 51 o gapiau i Gymru ers chwarae ei gêm gyntaf yn 2016.
Cafodd ei phenodi yn gapten i'r garfan ym mis Tachwedd 2019 ac mae hi wedi arwain y gad yn ystod cyfnod chwyldroadol i rygbi menywod yng Nghymru.
Roedd Lillicrap yn un o'r 12 chwaraewr cyntaf yng Nghymru i ennill cytundebau proffesiynol, gan wireddu breuddwyd o chwarae rygbi yn llawn amser.
What was always going to be a very tough announcement ⬇️
— Siwan Lillicrap (@SiwanLillicrap) November 30, 2022
I’ll carry the memories forever 🏴❤️ pic.twitter.com/mVacSAmhdQ
Llwyddodd y crysau cochion i orffen yn drydydd ym mhencampwriaeth y Chwe Gwlad eleni a chyrraedd yr wyth olaf yng Nghwpan y Byd yn Seland Newydd.
Dywedodd Lillicrap, a wnaeth droi'n 35 mis diwethaf, ei bod yn gwybod bod yr amser yn iawn iddi roi'r gorau i chwarae dros ei gwlad.
"Mae'n teimlo fel yr amser iawn i wneud y penderfyniad yma i gamu nôl o fod yn chwaraewr rhyngwladol wrth i baratoadau ddechrau am y Cwpan y Byd nesaf," meddai.
"Mae wedi bod yn benderfyniad anodd oherwydd mae'r crys coch yn meddwl gymaint i mi, ond yn gorfforol mae'n teimlo fel yr amser iawn.
"Ni gyd wedi gweithio mor galed dros y flwyddyn ddiwethaf ar gyfer Cwpan y Byd a dwi'n ddiolchgar i gael y cyfle i wireddu breuddwyd fel chwaraewr llawn amser."
Yn dilyn y cyhoeddiad, fe wnaeth hyfforddwr Cymru, Ioan Cunningham, ganmol Lillicrap am ei dylanwad ar rygbi menywod yng Nghymru.
"Mae hi wedi chwarae rôl enfawr yn natblygiad y garfan ac wedi sicrhau bod dyfodol y gêm mewn dwylo da.
"Mae wedi ysbrydoli'r genhedlaeth newydd a dwi'n sicr byddwn yn gweithio gyda'n gilydd rhywbryd yn y dyfodol."
Fe fydd Lillicrap yn parhau i chwarae yn uwch gynghrair rygbi Lloegr, wedi iddi symud o Fryste i Gaerloyw ym mis Gorffennaf.